Lavurs
Els exequeschan suandantas lavurs:
Preparar las lavurs
- preparar las lavurs vi da l'edifizi
- controllar las incumbensas e planisar la lavur
- controllar e preparar il material ed ils apparats da lavur, per exempel las maschinas da furar ed ils moduls solars
- esser en contact cun la clientella
- nudar las atgnas lavurs e mintgatant far ina skizza
- far skizzas d'elements simpels, per exempel d'in toc lain
- infurmar las persunas superiuras, quant enavant ch'els èn cun la lavur
Montar indrizs solars
- fixar la subconstrucziun da l'indriz solar sin il tetg, quai vul dir, ina fixaziun che permetta da montar l'indriz en moda segira e stabila
- montar ils moduls solars sin la subconstrucziun
- enconuscher e realisar las reglas da segirezza, per exempel las reglas per lavurar sin ils tetgs
- collavurar cun cuvratetgs, lainarias ed installaturs d'implants solars mantegnair e demontar indrizs solars
- mantegnair ils indrizs regularmain, per exempel controllar, sche tut funcziuna
- nettegiar ils indrizs
- demontar ils indrizs che na vegnan betg pli duvrads u che ston vegnir remplazzads
- dismetter en moda ecologica ils indrizs demontads, sche pussaivel uschia, ch'il material po vegnir reciclà
Scolaziun
Durada
2 onns
Furmaziun en la pratica
Tar ina interpresa dal provediment d'energia, ina firma d'installaziun solara, ina firma d'installaziun electrica u ina interpresa da la branscha solara.
Furmaziun en scola
Curs da bloc ad ina scola professiunala spezialisada.
Roms professiunals
- organisar lavurs a la mantellada d'edifizis
- montar ils indrizs solars
- mantegnair e demontar ils indrizs solars
Curs ordaifer il manaschi
Emprender la lavur pratica, approfundar ed exercitar las basas professiunalas, 20 dis durant 2 onns.
Diplom
Montader / Montadra d'implants solars AFP
Premissas
Furmaziun preliminara
- temp da scola obligatoric terminà
Pretensiuns
- inschign manual
- senza sturnizi
- imaginaziun tridimensiunala
- chapientscha pratica
Furmaziun supplementara
Curs
Purschidas da scolas spezialisadas e da scolas professiunalas spezialisadas, da Swissolar sco er d'ulteriuras federaziuns professiunalas.
Emprendissadi supplementar
Montaders / Montadras d'implants solars AFP pon per regla far ina furmaziun fundamentala scursanida sco installatur / installatura d'implants solars AFQ.
Suenter pon vegnir absolvidas las medemas furmaziuns supplementaras sco per installatur / installatura d'implants solars AFQ.
Cundiziuns da lavur
Montadras e montaders d'implants solars lavuran en il liber e bunamain da tutt'aura. Per intginas lavurs portan els in equipament da protecziun cun chapellina, chalzers da segirezza e guants. Els lavuran en in team, en l'aut sin tetgs e savens en posiziuns malempernaivlas. Lur temps da lavur pon esser differents tut tenor la stagiun. Els coordineschan lur lavurs cun autras persunas spezialisadas dal sectur da la mantellada d'edifizis e dal sectur da construcziun, per exempel cun toleras.
Montadras e montaders d'implants solars lavuran en ina interpresa dal provediment d'energia, in manaschi d'installaziuns electricas, ina firma d'installaziun da fotovoltaica u in'autra interpresa da la branscha solara. La dumonda d'installaziuns solaras crescha. Perquai èn las perspectivas sin il martgà da lavur bunas per questa glieud da professiun.
Ulteriuras infurmaziuns
Swissolar
8005 Turitg
URL: www.solarlehre.ch