Lavurs
Els exequeschan suandantas lavurs:
Planisar e preparar indrizs solars
- controllar las incumbensas e planisar la lavur
- controllar e preparar il material ed ils apparats da lavur, per exempel las maschinas da furar ed ils moduls solars
- esser en contact cun la clientella e la declerar, tge lavurs ch'els han fatg u vegnan anc a far
- documentar l'atgna lavur, per exempel cun skizzas da singuls elements
- infurmar las persunas superiuras davart il progress da la lavur
Montar ed installar indrizs solars
- montar ils indrizs solars sin tetgs, vi da fatschadas u vi d'edifizis
- enconuscher e realisar las reglas da la segirezza a la lavur, per exempel las reglas davart la lavur sin ils tetgs u davart il tractament d'electricitad
- metter e colliar ils conducts
- collavurar cun cuvratetgs, cun lainarias e cun electroinstallaturs e per exempel discutar cun els, co ch'il plaun sut il tetg è construì u sco che tolas ston vegnir montadas, per ch'ellas sa collian directamain cun l'indriz solar
- montar e colliar ils accumulaturs per energia solara, per che la forza electrica vegnia arcunada e stettia adina a disposiziun
- metter en funcziun ils indrizs solars
- surdar ils indrizs solars e declerar, co che las singulas parts dals indrizs funcziunan
Reparar, demontar e dismetter indrizs solars
- mantegnair ils indrizs, per exempel controllar, sch'in nettegiament è necessari u sch'il tetg sut l'indriz è anc en in bun stadi
- identifitgar ed eliminar simpels disturbis, per exempel, sch'in modul è rut pervia da granella u sch'in cabel sto vegnir remplazzà
- demontar indrizs ed als dismetter en moda ecologica
Scolaziun
Durada
3 onns
Furmaziun en la pratica
Tar ina interpresa dal provediment d'energia, ina firma d'installaziun solara, ina firma d'installaziun electrica u ina interpresa da la branscha solara.
Furmaziun en scola
Curs da bloc ad ina scola professiunala spezialisada
Roms professiunals
- organisar lavurs a la mantellada d'edifizis
- planisar e preparar la montascha e l'installaziun d'indrizs solars
- montar ed installar ils indrizs solars
- mantegnair, reparar e demontar ils indrizs solars
Curs ordaifer il manaschi
Emprender la lavur pratica, approfundar ed exercitar las basas professiunalas, 40 dis durant 3 onns.
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Installatur / Installatura d'implants solars AFQ
Premissas
Furmaziun preliminara
- temp da scola obligatoric terminà
Pretensiuns
- senza sturnizi
- inschign manual
- abilitad da communitgar
- imaginaziun tridimensiunala
- chapientscha tecnica
- chapientscha pratica
- gronda abilitad da lavurar en in team
Furmaziun supplementara
Curs
Purschidas da scolas spezialisadas e da scolas professiunalas spezialisadas, centers da furmaziun supplementara e federaziuns professiunalas e federaziuns da branschas.
Examen professiunal (EP)
P.ex. cun certificat professiunal federal
- Mainaproject en montascha solara
- Manader / Manadra da construcziun mantellada d'edifizi
- Cussegliader energetic / Cussegliadra energetica d'edifizis
Scola spezialisada superiura (SSS)
Studis en roms parentads, p.ex.:
- Tecnicist / Tecnicista dipl. en tecnica d'edifizis
- Automaticher / Automaticra d'edifizis dipl.
- Tecnicist / Tecnicista dipl. en energia ed ambient
- Inschigner / Inschignera da tecnica d'edifizis dipl.
Scola auta spezialisada (SAS)
Studis en secturs parentads, p.ex. bachelor of science en:
- tecnica d'edifizis
- tecnica d'energia e tecnologia ecologica
- inschigneria da l'ambient
- electrotecnica
- inschigneria da construcziun
Tut tenor la scola auta spezialisada valan differentas cundiziuns d'admissiun.
Cundiziuns da lavur
Installaturas ed installaturs d'implants solars lavuran en il liber e bunamain da tutt'aura. Tar tschertas lavurs portan els in equipament da protecziun cun chapellina, protecziun cunter il sulegl, chalzers da segirezza e guants, quai per garantir la segirezza. Els lavuran en in team, en l'aut sin tetgs e savens en posiziuns malempernaivlas. Lur temps da lavur pon variar tut tenor la stagiun. Els coordineschan lur lavurs cun autras persunas spezialisadas dal sectur da la mantellada d'edifizis e dal sectur da construcziun, per exempel cun toleras.
Installaturas ed installaturs d'implants solars lavuran en ina interpresa dal provediment d'energia, in manaschi d'installaziuns electricas, ina firma d'installaziun da fotovoltaica u in'autra interpresa da la branscha solara. Perquai che la dumonda d'installaziuns solaras crescha, è la glieud da professiun bain scolada dumandada sin il martgà da lavur.