Lavurs
Lur lavurs èn las suandantas:
Preparar las lavurs
- prender encunter e chapir las incumbensas
-
guardar, ch'il material, las maschinas ed ils urdains sajan pronts, per exempel
colliar las maschinas en moda segira cun l'electricitad - controllar las parts furnidas, p.ex. guardar, sche la furniziun è cumpletta e che nagut na saja rut
- far skizzas sin il plazzal, per che la situaziun al lieu saja clera per els
Fabritgar elements
- gidar a fabritgar elements sco tocs furmads, conducts da ventilaziun u surdinas
- calcular, tge furma e tge grondezza che las parts da tola ston avair
- tagliar las parts da tola e las storscher en la dretga furma
- manipular las maschinas d'urdains che vegnan regladas per computer, uschenumnadas maschinas CNC u NC
- controllar e cumponer tocs da furma e conducts da ventilaziun
- gidar a fabritgar roms per surdinas e material d'isolaziun, p.ex. tagliar launa minerala
- sortir e dismetter correctamain differents ruments, observar las prescripziuns da l'ambient
Installar e demontar ventilaziuns
- guardar – ensemen cun la persuna superiura – sin il plan, nua ch'ils elements ston vegnir montads
- gidar a montar ils elements ed ad installar sistems da ventilaziun
- isolar perforaziuns da paraids e da palantschieus sura, quai vul dir plazzar material d'isolaziun en las chavas per ils conducts
- gidar ad installar currents d'aria, quai èn averturas, tras las qualas aria vegn suflada en il local
- demontar en il team ventilaziuns veglias
Scolaziun
Durada
2 onns
Furmaziun en la pratica
En in manaschi per installaziuns da ventilaziuns
Furmaziun en scola
1 di per emna en la scola professiunala spezialisada
Roms professiunals
- planisar las lavurs
- preparar la producziun e la montascha
- fabritgar sistems da ventilaziun ed elements
- installar sistems da ventilaziun ed elements
Curs ordaifer il manaschi
Emprender la lavur pratica, approfundar ed exercitar las basas professiunalas, 21 dis durant 2 onns.
Diplom
Practicist / Practicista d'indrizs da ventilaziun AFP
Premissas
Furmaziun preliminara
- terminà la scola obligatorica
Pretensiuns
- inschign manual
- chapientscha pratica
- agilitad corporala
- sanadad robusta
- senza sturnizi
- gronda abilitad da lavurar en in team
- imaginaziun tridimensiunala
Furmaziun supplementara
Curs
Purschidas da scolas spezialisadas e da scolas professiunalas spezialisadas, dals centers da furmaziun da suissetec sco er d'interpresas da la branscha da tecnica d'edifizis.
Emprendissadi supplementar
Practicistas e practicists d'indrizs da ventilaziun AFP pon per regla far in emprendissadi supplementar scursanì sco constructur / constructura da ventilaziuns AFQ. Suenter pon vegnir absolvidas las medemas furmaziuns supplementaras sco per constructur / constructura da ventilaziuns AFQ.
Cundiziuns da lavur
Practicistas e practicists d'indrizs da ventilaziun lavuran en manaschis pitschens fin gronds per installaziuns da ventilaziuns, per tecnica da ventilaziun e da clima u en manaschis da stgaudament, da ventilaziun e sanitars. Els lavuran adina en il team e survegnan lur incumbensas da constructurs da ventilaziuns. Els exequeschan lur lavurs en il lavuratori u sin il plazzal. A la lavur po per part reger canera. Els han er contact cun clientella, furniturs e spezialistas d'autras professiuns, p.ex. planisadras da tecnica d'edifizis.
A la lavur portan practicistas e practicists d'indrizs da ventilaziun in equipament da protecziun, p.ex. chapellina, guants, chalzers da segirezza, protecziun d'udida ed egliers da protecziun. Lur temps da lavur èn regulars. Mintgatant ston els lavurar pli ditg, per ch'els possian observar tscherts termins. Per regla n'èsi betg difficil da chattar ina plazza d'emprendissadi. Suenter l'emprendissadi datti differentas pussaivladads da svilup. Per exempel en il sectur da l'effizienza energetica che daventa adina pli impurtanta en la branscha da construcziun.
Ulteriuras infurmaziuns
Associaziun svizra e dal Liechtenstein da tecnica da constucziun (suissetec)
8021 Turitg 1
URL: www.suissetec.ch