Lavurs
Lur lavurs èn las suandantas:
Analisa
- chapir models da fatschenta, quai vul dir, co che l'interpresa gudogna ses daners, ed examinar ils process da lavur en l'interpresa
- preschentar las experientschas dals utilisaders, p.ex. en cas da process da cudeschaziun u da pajament u en cas da la furniziun da products
- rimnar datas per l'analisa, p.ex. dumbers da visitaders, cifras da vendita, inventaris en magasin u indicaturs da martgà
- evaluar, structurar e rectifitgar las datas sco er analisar ils resultats
- rediger in rapport cun las observaziuns, p.ex. inditgar ils eventuals puncts debels
- proponer optimaziuns per simplifitgar process, p.ex. ina soluziun segira che permetta d'avrir online in conto da banca, senza ir al spurtegl
- preschentar graficamain las datas, ils resultats e las propostas d'optimaziun e declerar quels a chaschun da sesidas
Svilup e realisaziun
- coordinar ils pass da lavur tranter las differentas collavuraturas ed ils differents collavuraturs ch'èn participads al svilup d'in instrument digital, p.ex. informatichers u sviluppadras
- en cas da basegn dumandar cussegl ad autras persunas spezialisadas, p.ex. tecnicistas u spezialists da process
- organisar e manar sesidas e lavuratoris per rapportar davart il progress dals projects e per chattar soluziuns per ils problems
- controllar e documentar il progress dal project
- concepir documents da scolaziun ed instrucziuns per las utilisadras ed ils utilisaders
Controlla dals resultats
- valitar il success e las consequenzas da las soluziuns proponidas, p.ex. guardar, sch'igl è vegnì lavurà pli svelt, sche process han pudì vegnir simplifitgads u sche las utilisadras ed ils utilisaders han pudì duvrar meglier in instrument
- en cas da basegn far ulteriuras optimaziuns, p.ex. sche tscherts puncts n'èn betg vegnids vesids
- persequitar ed examinar las tendenzas e las innovaziuns en il sectur dad ICT (tecnologia d'infurmaziun e da communicaziun)
Scolaziun
Durada
4 onns
Furmaziun en la pratica
en in manaschi da servetsch, d'industria u da mastergn ubain en l'administraziun
Furmaziun en scola
1 fin 2 dis per emna en la scola professiunala spezialisada
Roms professiunals
- accumpagnar projects
- preschentar, automatisar ed optimar process da gestiun
- analisar datas
- communitgar ils resultats
- introducir soluziuns en il mund digital
Curs ordaifer il manaschi
Emprender la lavur pratica, approfundar ed exercitar las basas professiunalas, 35 dis durant 4 onns.
Maturitad professiunala
Sche las prestaziuns da scola èn fitg bunas, po vegnir frequentada la scola da maturitad professiunala durant la furmaziun da basa.
Diplom
Sviluppader / Sviluppadra da business digital AFQ
Premissas
Furmaziun preliminara
- terminà la scola obligatorica
Pretensiuns
- abilitad communicativa
- abilitad organisatorica
- chapientscha tecnica
- pensar abstract e logic
Furmaziun supplementara
Curs
purschidas da scolas spezialisadas superiuras e da federaziuns
Examen professiunal (EP)
Cun attestat professiunal federal, p.ex.:
- Informaticher / Informaticra d'economia
- Sviluppader / Sviluppadra d'applicaziuns ICT
- Tecnicist / Tecnicista da sistem e da rait ICT
Examen professiunal superiur (EPS)
P.ex. manager / managera dad ICT dipl.
Scola auta spezialisada (SAS)
P.ex. bachelor of science (SAS) en informatica da manaschi u en informatica e sistems da communicaziun.
Tut tenor la scola auta spezialisada valan differentas cundiziuns d'admissiun.
Cundiziuns da lavur
Sviluppadras e sviluppaders da business digital lavuran en in team e surpiglian la direcziun da projects pitschens. Els lavuran ensemen cun inschigneras, sviluppaders d'applicaziuns, informaticras d'economia, contabilists u persunas spezialisadas per il svilup d'interpresas. Ultra da quai han els contact cun la clientella, p.ex. interpresas che vulan digitalisar lur lavur. Els lavuran al computer e pon pia lavurar davent d'in auter lieu. Els pon avair uras da lavur flexiblas e lavurar a temp cumplain u a temp parzial.
Sviluppadras e sviluppaders da business digital pon lavurar en tut las interpresas ed organisaziuns che realiseschan u planiseschan lur transfurmaziun digitala, p.ex. bancas, assicuranzas, purschiders da telecommunicaziun, administraziun publica, industria farmaceutica, industria u polizia. Els èn participads a projects en in grond dumber da secturs: IT, change management, experientscha cun clientella, gestiun da l'interpresa, management da chadainas da furniziun, garanzia da qualitad, finanzas e controlling, fatgs da persunal, management da process, marketing u servetschs da stab. En vista a la digitalisaziun pli e pli intensiva en la societad ed en vista a la mancanza da persunas spezialisadas èn las perspectivas sin il martgà da lavur bunas.
Igl è impurtant da frequentar permanentamain furmaziuns supplementaras per esser infurmà davart tendenzas e davart innovaziuns.
Ulteriuras infurmaziuns
Furmaziun professiunala dad ICT Svizra
3011 Bern
URL: www.ict-berufsbildung.ch