Lavurs
Els exequeschan suandantas lavurs:
Planisar las lavurs
- leger e chapir ils plans da las architectas
- mesirar exactamain las fanestras, las terrassas ed ils balcuns al lieu
- marcar sin ils plans las posiziuns futuras da las colliaziuns electricas dals sistems da storas automatics
- cussegliar la clientella davart differentas storas, per exempel davart sistems manuals u automatics, storas interiuras u exteriuras sco er material, furma e colur da las storas
- controllar la rauba furnida
- organisar il transport dal material tar la clientella u sin il plazzal
Montar las storas
- endrizzar la plazza da lavur
- giuditgar il funs da fixaziun (là, nua che las storas vegnan montadas), per exempel examinar, sch'ina paraid è adattada per montar storas
- montar, adattar u fixar las lingias, las fermanzas e las fixaziuns, tut tenor il tip da storas u da sistems che vegn montà
- programmar il telecumond da las storas automaticas, resguardond facturs sco l'irradiaziun dal sulegl, la fermezza dal vent u la plievgia
- observar las infurmaziuns ed instrucziuns dals furniturs sco er ils standards da segirezza e las prescripziuns legalas
- testar las storas automaticas, far adattaziuns e silsuenter metter en funcziun talas
- explitgar a la clientella, co che las storas ed ils sistems funcziunan
Mantegniment e reparaturas
- controllar il stadi da las storas
- demontar e nettegiar las storas, remplazzar ils tocs defects
- dismetter ruments en moda ecologica
- meglierar, midar u automatisar ils sistems da storas gia montads
- recumandar ils products da substituziun, sch'insatge na po betg vegnir reparà
- nettegiar e mantegnair ils apparats ed ils urdains
Scolaziun
Durada
3 onns
Furmaziun en la pratica
En in manaschi da la branscha da la mantellada d'edifizis
Furmaziun en scola
Curs da bloc en las scolas professiunalas spezialisadas ad Uzwil/SG u a Les Paccots/FR
Roms professiunals
- organisar lavurs a la mantellada d'edifizis
- planisar e preparar las lavurs per ils sistems da protecziun cunter il sulegl e da storas
- montar ils sistems da protecziun cunter il sulegl e da storas
- mantegnair, reparar e demontar ils sistems da protecziun cunter il sulegl e da storas
Curs ordaifer il manaschi
Emprender la lavur pratica, approfundar ed exercitar las basas professiunalas, 42 dis durant 3 onns.
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Spezialist / Spezialista per tecnica da parasulegl e storas AFQ
Premissas
Furmaziun preliminara
- temp da scola obligatoric terminà
Pretensiuns
- inschign manual
- chapientscha tecnica
- abilitad da lavurar en in team
- chapientscha pratica
- imaginaziun tridimensiunala
- constituziun sauna e ferma
- agilitad
- senza sturnizi
Furmaziun supplementara
Curs
Purschidas da scolas spezialisadas e da scolas professiunalas spezialisadas, dal Center da furmaziun Polybau sco er d'interpresas da la branscha da la mantellada d'edifizis.
Examen professiunal (EP)
P.ex. cussegliadra energetica u cussegliader energetic cun certificat federal ubain mainaproject protecziun cunter il sulegl cun attestat professiunal federal
Examen professiunal superiur (EPS)
P.ex. maistra u maister mantellada d'edifizis cun diplom federal
Scola spezialisada superiura (SSS)
Scolaziuns en secturs specifics parentads, p.ex. tecnicist / tecnicista dipl. SSS surveglianza da construcziun
Scola auta spezialisada (SAS)
Studis en secturs specifics parentads, p.ex. bachelor of science en inschigneria da construcziun. Tut tenor la scola auta spezialisada valan differentas cundiziuns d'admissiun.
Cundiziuns da lavur
Persunas spezialisadas per tecnica da parasulegl e storas lavuran sulettas u en duas. Ellas lavuran tenor in plan prescrit. Per far reparaturas van ellas tar la clientella e liquideschan las lavurs al lieu, pia en abitaziuns privatas u en manaschis. Sin gronds plazzals, per exempel da chasas da pliras famiglias u da scolas, fan ellas part dal team da montascha e coordineschan lur lavurs cun auters mastergnants dal sectur mantellada d'edifizis, per exempel cun constructuras da fatschadas, montaders da fanestras e constructuras da puntanadas. Lur temps da lavur èn regulars. Tut tenor la stagiun ston ellas mintgatant lavurar pli ditg, per che edifizis vegnian terminads a temp.
La gronda part da las persunas spezialisadas per tecnica da parasulegl e storas lavuran en manaschis da construcziun pitschens, mesauns e gronds, ch'èn sa spezialisads sin storas. Suenter in'experientscha professiunala d'intgins onns pon spezialistas u spezialists per tecnica da parasulegl e storas surpigliar posiziuns da gronda responsabladad, per exempel sco manadra da project, manader da montascha, collavuratura da vendita u cussegliader da clientella. Ultra da quai han els la pussaivladad da fundar in'atgna firma e da lavurar en moda independenta.
Ulteriuras infurmaziuns
Center da furmaziun Polybau
9240 Uzwil
URL: www.polybau.ch
Associaziun svizra per tecnica da parasulegl e storas VSR
8005 Turitg
URL: www.storen-vsr.ch