Lavurs
Constructuras e constructurs fan dissegns tecnics per lur incumbensaders. Ils dissegns mussan parts d'apparats, d'indrizs mecanics u d'iseglia. Constructuras e constructurs èn responsabels per l'observaziun e per la calculaziun precisa da la grondezza dals tocs.
Lur lavurs èn las suandantas:
Planisar projects
- examinar dumondas per projects
- analisar las funcziuns da las parts da l'apparat planisà
- elavurar soluziuns per il project, cun agid da skizzas e da programs da computer (CAD)
- observar las prescripziuns e las normas tar l'elavuraziun dal project
Realisar projects
- dissegnar al computer differentas vistas dal project, p.ex. en 3D
- inditgar la dimensiun e la structura da la surfatscha da las singulas parts dal project
- calcular il pais, la surfatscha u il volumen da las parts dal project
- tscherner materialias adattadas
- stimar ed empustar la quantitad da las materialias che vegnan duvradas
- far – ensemen cun il manader da producziun – ina glista da l'iseglia ch'ins dovra e l'empustar ubain producir sez tala
- examinar prototips per il project (toc producì)
- survegliar il progress da las lavurs
- far in plan da montascha
- rediger l'instrucziun da diever e da mantegniment sco er las datas tecnicas dal product en tudestg u en ina lingua estra
Scolaziun
Durada
4 onns
Furmaziun en la pratica professiunala
en in manaschi da l'industria da maschinas, d'electronica e da metal (industria MEM)
Furmaziun en scola
1,5 fin 2 dis per emna en la scola professiunala spezialisada
Furmaziun da scola a temp cumplain
- Scola tecnica spezialisada, Berna
- Scola tecnica spezialisada, Bienna
Dapli infurmaziuns: cussegliaziun.ch/scolas
Cuntegns didactics
- enconuschientschas da basa tecnicas (matematica, informatica, tecnica d'emprender e da lavur, fisica)
- englais tecnic
- tecnica da material e da producziun
- tecnica da dissegn e da maschinas
- tecnica d'electronica e da regulaziun
- projects interdisciplinars
Curs intermanaschials
Emprender la lavur pratica, approfundar ed exercitar las basas professiunalas, 54 dis durant 4 onns.
Maturitad professiunala
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun fundamentala.
Diplom
Constructur / Constructura AFQ
Premissas
Furmaziun preliminara
- terminà scola obligatorica
Pretensiuns
- interess per connexs tecnics e per mecanica
- chapientscha per connexs abstracts
- abilitad da s'imaginar objects en moda tridimensiunala
- mauns inschignus per lavurs exactas
- pazienza, perseveranza e concentraziun
- plaschair da lavurar cun computers
- abilitad da lavurar en in team
- talent organisatoric
Furmaziun supplementara
Curs
Purschidas da scolas professiunalas spezialisadas e da scolas spezialisadas superiuras, da federaziuns spezialisadas, da la Swissmem Academy e da Swissmechanic
Examen professiunal (EP)
cun certificat professiunal: p.ex.:
Examen professiunal superiur (EPS)
p.ex. manader/-dra da producziun Industria dipl.
Scola spezialisada superiura (SSS)
p.ex. tecnicist/-a da construcziun dipl., electronist/-a dipl. SSS
Scola auta spezialisada (SAS)
Studis en secturs spezials parentads, p.ex. bachelor of science en tecnica da maschinas, en electrotecnica u en mecatronica. Tut tenor la scola auta spezialisada valan differentas cundiziuns d'admissiun.
Cundiziuns da lavur
Tut tenor lur lieu da lavur sviluppan constructuras e constructurs differents products d'industria, davent d'instruments medicinals sur motors, turbinas, maschinas da lavar, locomotivas fin a trottinets. Els lavuran sin champs sco mecanica, robotica, automobil, aviatica ed astronautica, microtecnica u fatgs da construcziun. En ils lieus da producziun collavuran las constructuras ed ils constructurs tant cun inschigneras e tecnicists sco er cun persunas spezialisadas, p.ex. cun constructuras d'apparats industrials, cun polimecanistas, cun mecanists da producziun, cun tecnicistas d'automatisaziun e cun electronists.
Tut tenor la situaziun han els er savens contact cun la clientella e cun ils furniturs.
Lur mintgadi passentan els principalmain en biro, ma er en ils lavuratoris. Ils meds d'informatica e las materialias sa sviluppan d'in cuntin. Perquai duessan constructuras e constructurs absolver cuntinuadamain furmaziuns supplementaras per tegnair pass cun il svilup tecnologic.
Ulteriuras infurmaziuns
Swissmem Berufsbildung
8400 Winterthur
URL: www.swissmemberufsbildung.ch
Verband Ausbildung Konstrukteure Bern VAKB
3000 Bern konstrukteur-in.ch
URL: www.konstrukteur-in.ch