Lavurs
Lur lavurs èn las suandantas:
En il lavuratori
- prender mesira e far plans e skizzas a maun u cun ils programs CAD, pia al computer
- tscherner la laina adattada, calcular la quantitad da laina necessaria, ed empustar quella tar ina resgia u tar fatschentas da laina
- marcar e preparar la laina per la tagliar e per l'elavurar
- resgiar, fresar, splanar e furar ils elements da lain cun differentas maschinas ed utensils
- tractar la laina, per exempel impregnar u dar si lac
- magasinar en moda professiunala elements da lain finids ed als preparar, nudar ed eventualmain numerar per il transport sin il plazzal
- procurar per la segirezza al plaz da lavur, per exempel cun chapellinas e guants da protecziun u cun chalzers cun chapitsch d'atschal
Sin il plazzal
- preparar urdains, apparats e maschinas ed als transportar ensemen cun ils elements da lain sin il plazzal
- metter ensemen singuls tocs ed adattar là, nua che quai è necessari
- montar elements da lain ed eriger construcziuns da lain, per exempel tetgaglias, tavlegiads e tavladiras dal palantschieu sura, stgalas, lautgas, roms da fanestras u plattas d'isolaziun
- montar stresas da protecziun, isolaziuns termicas ed acusticas sco er sche necessari elements supplementars, sco per exempel collecturs solars
- remplazzar elements da lain u reparar parts existentas e tgirar il lain en cas da reparaturas e da renovaziuns
- tegnair en urden urdains, apparats e maschinas
- enconuscher e savair applitgar las reglas da la protecziun da l'ambient e da lavur
Scolaziun
Durada
4 onns
Furmaziun en la pratica
en ina lainaria u en ina interpresa da construcziun en lain
Furmaziun en scola
1 di per emna en la scola professiunala spezialisada
Roms professiunals
- preparar las lavurs
- tagliar e pressegiar exactamain parts da construcziuns
- eriger construcziuns en lain
- prefabritgar parts d'edifizis
- montar stresas da protecziun ed isolaziuns
- montar tavladiras / subconstrucziuns
- montar products prefabritgads
Curs ordaifer il manaschi
emprender la lavur pratica, approfundar ed exercitar las basas professiunalas, 48 dis durant 4 onns
Maturitad professiunala
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun da basa.
Diplom
Lainari / Lainaria AFQ
Premissas
Furmaziun preliminara
- terminà la scola obligatorica
Pretensiuns
- inschign manual
- imaginaziun tridimensiunala
- chapientscha tecnica
- gronda abilitad da lavurar en in team
- sanadad robusta
- forza ed agilitad corporala
- senza sturnizi
Furmaziun supplementara
Curs
purschidas da scolas spezialisadas e da scolas professiunalas spezialisadas, da l'Associaziun svizra da las interpresas da construcziun en lain
Furmaziun da basa scursanida
Lainarias e lainaris AFQ pon per regla far in emprendissadi scursanì sco scrinaria / scrinari AFQ, sco dissegnadra / dissegnader AFQ u sco installatura / installatur d'implants solars AFQ.
Examen professiunal (EP)
p.ex. cun attestat professiunal federal:
- Polier lainari / Poliera lainaria
- Capolavurer / Capolavurera da construcziun en lain
- Spezialist / Spezialista da lain
Examen professiunal superiur (EPS)
p.ex. Maister-lainari / Maistra-lainaria cun diplom federal u Manader / Manadra da construcziun cun diplom federal
Scola spezialisada superiura (SSS)
studis en roms spezialisads parentads, p.ex. Tecnicist / Tecnicista da lain dipl. SSS construcziun en lain
Scola auta spezialisada (SAS)
studis en secturs parentads, p.ex. bachelor of science en tecnica en lain, architectura u inschigneria da construcziun
Tut tenor la scola auta spezialisada valan differentas cundiziuns d'admissiun.
Cundiziuns da lavur
Lainarias e lainaris lavuran en lavuratoris u sin plazzals. Ellas ed els lavuran savens en teams sut la direcziun da capolavurers u da tecnicistas da construcziun en lain. La glieud da professiun porta in equipament da protecziun, sco per exempel chalzers cun chapitsch d'atschal, chapellinas u tschintas per sa segirar. Lur lavur dependa fermamain da l'aura. Pervia da quai coordineschan ellas ed els lur lavur cun autras persunas spezialisadas sin il plazzal.
Lainarias e lainaris lavuran en lainarias da tuttas grondezzas u en manaschis industrials che sa spezialiseschan sin prefabricats u sin la construcziun da chasas. Cun in'experientscha professiunala d'intgins onns pon ellas ed els lavurar sco manader d'in team, sco manadra d'in lavuratori u sco capolavurer. Cun las furmaziuns supplementaras correspundentas po la glieud da professiun manar in manaschi.
Ulteriuras infurmaziuns
Construcziun en lain Svizra
8050 Turitg
URL: www.holzbau-schweiz.ch