Lavurs
Spezialistas e spezialists per la promoziun dal moviment e da la sanadad accumpognan persunas da tut las vegliadetgnas en centers da fitness e sumegliantas instituziuns. Els erueschan lur basegns e resguardan ils giavischs e las circumstanzas da la vita per porscher programs da moviment e da schluccar adattai.
Els exequeschan suandantas lavurs:
Analisa da la situaziun persunala
- far bainvegni a la clientella e dumandar suenter giavischs, basegns u circumstanzas da la vita
- emplenir ina descripziun da la persuna ed agiuntar quella cun in questiunari davart la sanadad
- fixar finamiras individualas e realisticas sco er sustegnair la realisaziun d’in stil da viver sanadaivel cun moviment, recreaziun e bun nutriment
Porscher programs
- metter ensemen e porscher programs da standard da moviment e da schluccar per persunas singulas u gruppas
- adattar programs da trenament individualmain
- gidar tar l’elecziun dal indriz da sport il pli adattà, p.ex. velo, apparat da remblar, bindel da currer
- mussar exercizis, curreger la posiziun dal corp e controllar il diever dals apparats
- motivar ils participants sco er mesirar e documentar lur prestaziuns
- far exercizis da coordinaziun, da movibladad, da rinforzament da la musculatura ni da cundiziun cun musica ritmica
- gidar en cas da situaziuns d’urgenza e dar alarm sche necessari
Cussegliaziun e vendita
- infurmar e cussegliar la clientella, per part en linguas estras
- vender abunaments e products, p.ex. aditivs alimentars, material u vestgadira da sport
- administrar inventari dal deposit
- s’infurmar davart novs trends e svilups
Lavurs administrativas
- manar l’agenda e respunder telefons
- far la correspundenza sco er statisticas e tschentar quint
- far enquistas da clientella e respunder a reclamaziuns
Tgira e mantegniment
- controllar, tgirar e mantegnair locals, endrizzament, apparats e material
- resguardar prescripziuns da igiena e dismetter products da nettegiar adattà a l’ambient
Scolaziun
Durada
3 onns
Furmaziun en la pratica
En in center da fitness u da la sanadad, en in studio da gimnastica u tar l’uffizi da sport
Furmaziun en scola
1.+ 2. onn, 2 dis ed il 3. onn, 1 di l'emna a la scola professiunala
Roms professiunals
- distinguer e promover in stil da viver sanadaivel
- registraziun da datas, formulaziun da finamiras, elavuraziun da concepts
- realisar, evaluar ed adattar concepts che promovan il moviment
- communicaziun cun la clientella, resguardar process dal manaschi
- cussegliaziun e vendita
- administraziun dal manaschi
- nettezza, funcziunalitad, ecologia, conturn da lavur segir
Curs ordaifer il manaschi
Emprender ed exercitar la basa professiunala a moda pratica. 15-17 dis durant 3 onns
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Spezialista / Spezialist per la promoziun dal moviment e da la sanadad AFQ
Premissas
Furmaziun preliminara
- Temp da scola obligatoric terminà
Pretensiuns
- esser gugent en contact direct cun umans
- auta abilitad da communitgar
- empatia
- plaschair da sa mover
- fitness corporala / movibilitad
- interess da promover la sanadad
- buna sanadad ed in stil da viver sanadaivel
Furmaziun supplementara
Curs
purschidas d’instituziuns en il sectur da la promoziun dal moviment e da la sanadad sco era da federaziuns e d'associaziuns professiunalas, p.ex. Federaziun svizra dals centers da fitness e da sanadad SFGV, Associaziun professiunala svizra per sanadad e moviment BGB u Associaziun svizra per sport da sanadad e terapia da sport SFGS, euv.
Spezialisaziun
p.ex. pedagog / pedagoga da moviment
Examen professiunal (EP)
p.ex. spezialista da la promoziun dal moviment e da la sanadad cun certificat professiunal federal, trenader da sport da prestaziun cun certificat professiunal federal
Examen professiunal superiur (EPS)
p.ex. experta per la promoziun dal moviment e da la sanadad dipl., trenader da sport da prestaziun dipl.
Scola superiura spezialisada
p.ex. pedagoga da moviment dipl. SAS
Scola auta spezialisada (SAS)
p.ex. Bachelor of Arts (SAS) en musica e moviment, Bachelor / Master of Science (SAS) en la promoziun da la sanadad e da la prevenziun, en fisioterapia u en nutriment ed dietetica, Bachelor of Science (SAS) en terapia psicomotorica, Bachelor/Master of Science (SAFSM) en sports, Bachelor of Science (SAS). Tut tenor scola auta spezialisada valan differentas cundiziuns d’admissiun.
Cundiziuns da lavur
Spezialists per la promoziun dal moviment e da la sanadad lavuran en centers da wellness e da sanadad, en studios da gimnastica, tar uffizis da sport u uniuns, en hotels ed ulteriuras instituziuns da la promoziun dal moviment e da la sanadad. Els lavuran persuls u en collavuraziun cun trenaders da fitness, manadras da gimnastica, massaders u cosmeticras. Els portan vestgadira adattada per activitads fisicas. Lur temp da lavur po esser lungs e malregulads, damai ch’ils studios da fitness èn er averts la saira u la fin da l’emna.
Las glieud da professiun chattan plitost lavur en citads u en regiuns turisticas. Cun intgina experientscha pon els surpigliar la direcziun d’in center da fitness u vegnir sur sasez.
Ulteriuras infurmaziuns
OdA Moviment e sanadad
Associaziun tetgala svizra da las professiuns da moviment
3000 Berna
Tel: +41 848 000 423
URL: www.bewegunggesundheit.ch
Federaziun svizra dals centers da fitness e da sanadad SFGV
URL: sfgv.ch
Associaziun professiunala svizra per sanadad e moviment BGB
URL: www.bgb-schweiz.ch
Schweizerischer Verband für Gesundheitssport und Sporttherapie
URL: www.svgs.ch