Lavurs
Cuschiniers e cuschinieras lavuran en cuschinas da restaurants, ospitals, chasas d'attempads u cantinas. Cura ch’els vegnan la damaun a la lavur, planiseschan els l’emprim il decurs dal di per che tut ils pass da lavur funcziunian per las proximas uras a moda speditiva. Lura controlleschan els ils products ch'èn vegnids furnì sin lur frestgadad. L’incumbensa da cuschiniers è da controllar, sche la qualitad è acceptabla e sche la quantitad furnida constat cun las indicaziuns sin il scrit da furniziun respectivamain cun l’empustaziun. Suenter preparan els la vaschella da cuschinar ed ils utensils e cumenzan cun l’elavuraziun da las victualias.
Cuschiniers dovran differentas tecnicas da lavur. Latiers tutgan per exempel coier cun vapur, pargialar, gratinar, grillar, brassar curtamain e poschar. Els preparan schuppas, sosas, fonds e garnituras da legums sco er ris e spaisas da farina. En la cuschina fraida preparan els plattas da charn, salatas e pastetas, sin il champ da la patissaria creeschan els differentas pastizarias dultschas u saladas.
Cuschiniers che lavuran al post da l’entremetier èn responsabels per garnituras sco spaisas da legums, schuppas, farina, ovs e chaschiel. Sco gardemanger lavuran els en la cuschina fraida cun charn, pesch, giaglinom e selvaschina e preparan avantpasts sco mousse da salmun e tatar da bov, preparan dentant era salatas. Al post dal sosier vegnan preparadas tratgas da charn, da peschs e tratgas cun giaglinom. Las sosas che tutgan latiers ston esser liquidas enfin consistentas e bain cundidas. Per il dessert a la fin preparan els spaisas dultschas sco glatschs, sorbets e cremas.
Durant las uras da mangiar èsi hectic en cuschina. Surtut durant il mezdi stiman ils giasts in servetsch speditiv. Per che tut funcziunia senza difficultads tranter cuschina e persunal dal service ston cuschiniers esser resistents a strapatschs e planisar bain lur lavur. Els procuran per nettezza ed urden ed observan las perscripziuns pertutgant igiena, protecziun da lavur, da l’ambient e cunter incendis.
En la cuschina regia ina clera ierarchia, a la testa maina il schef da cuschina u la scheffa da cuschina il manaschi ed il schefcuschinier u la schefcuschiniera deleghescha la lavur vi da la platta da cuschinar.
Scolaziun
Basa legala
Ordinaziun federala 5-5-2009
Durada
3 onns
Furmaziun en la pratica
En in restaurant, hotel, ospital, chasa u restaurant da persunal (u en in manaschi da l’onn u da stagiun; durant almain 35 emnas mintg’onn)
Furmaziun en scola
- En in manaschi da l’onn: 1 di per emna a la scola professiunala
- En in manaschi da stagiun: 2 giadas per onn instrucziun en bloc durant curs professiunals interchantunals (4 fin 5 emnas)
Roms professiunals
- Producziun
- Preparaziun
- preschentaziun da spaisas e tratgas
- lingua estra
- chapir il manaschi e cooperar a moda effizienta
- resguardar l’economia dal manaschi
- metter en il center ils giasts e pensar a moda persistenta
- segirezza da la lavur
- protecziun da la sanadad
- protecziun da l’ambient e protecziun cunter incendis
- igiena e mantegniment da la valur
Curs ordaifer il manaschi
Tar differents temas
Maturitad professiunala
Pussaivel durant l’emprendissadi u suenter la furmaziun da basa
Diplom
Attestat federal da qualificaziun "cuschinier / cuschiniera AFQ"
Premissas
Furmaziun preliminara
- scola populara cun pretensiuns mediocras u autas
- enconuschientschas da linguas estras è d'avantatg
Pretensiuns
- plaschair da cuschinar e da s’occupar cun victualias
- bun dun receptiv
- abilitad da coordinar andaments da la lavur
- creativitad e plaschair d’experimentar
- mauns inschignus
- ferma conscienza d’igiena
- senn per l’urden
- bun nas e bun gust
- insatgi che metta en il center ils giasts ed il team
- sanadad robusta (lavur oravant tut en pe)
- abilitad da supportar squitsch en situaziuns hecticas
Furmaziun supplementara
Curs
purschidas da federaziuns professiunalas e scolas spezialisadas superiuras
Furmaziun da basa scursanida
cuschinier / cuschiniera da dieta AFQ, spezialist / spezialista da restauraziun AFQ, spezialist / spezialista d’hotellaria AFQ, pasterner / pasternera pastizier / pastiziera confisier / confisiera AFQ, spezialist / spezialista da charn AFQ
Examen professiunal (EP)
cun certificat professiunal federal: schefcuschinier / schefcuschinera, manader da gestiun / manadra da gestiun gastro
Examen professiunal superiur (EPS)
schef da cuschina / scheffa da cuschina dipl, manader / manadra dipl. da la gastronomia da cuminanza
Scola spezialisada superiura (SSS)
hotelier / hoteliera dipl., restauratur / restauratura dipl. SSS
Scola auta spezialisada (SAS)
Bachelor of Science (SAS) en tecnologia da victualias, Bachelor of Science (SAS) in International Hospitality Management
Cundiziuns da lavur
Cuschiniers chattan bunas plazzas en manaschis d’hotel, restaurants, ospitals, chasas d’abitar publicas e restaurants da persunal.
Il temp da lavur è irregular e po durar enfin la saira tard. Dumengias e firads pretendan savens in engaschi spezial, cunquai ch’i regia durant quest temp dapli truscha.
Ulteriuras infurmaziuns
GastroSuisse
Verband für Hotellerie und Restauration
Blumenfeldstr. 20
Postfach
8046 Zürich
Tel: 0848 377 111
URL: www.gastrosuisse.ch
Hotelleriesuisse
Marketing & Verkauf Bildung
Monbijoustr. 130
Postfach
3001 Bern
Tel: 031 370 41 11
URL: www.berufehotelgastro.ch
Berufsbildungszentrum Hotel & Gastro formation
Eichistr. 20
6353 Weggis
Tel: 041 392 77 77
URL: www.hotelgastro.ch