Lavurs
Els exequeschan suandantas lavurs:
Sbartgament e partenza da las navs
- calcular la stabilitad per chargiar e per stgargiar las navs
- controllar la qualitad da la chargia
- manevrar navs en moda segira durant il sbartgament e la partenza
- fixar u schliar en moda professiunala e segira las navs cun sugas u cun fildarom a maun u cun meds auxiliars mecanics, p.ex. cun in turn da suga
- exequir ina manevra d'ancra segira
- avant e durant las manevras communitgar sur func cun la conductura u il conductur da la nav ed annunziar las distanzas al quai u a la porta da la sclusa
A bord da las navs
- navigar la nav sut la surveglianza da la conductura u dal conductur
- manipular rembels, motors e meds auxiliars nautics sco radar, func e GPS cun charta electronica
- surpigliar la responsabladad per ils sistems da surveglianza da las maschinas, da las pumpas e dals auters apparats a bord
- en cas da disturbis infurmar ils commembers da la squadra, per ch'els reparian p.ex. ina pumpa defecta u filters stuppads
- tenor las prescripziuns procurar per la segirezza da las passagieras e dals passagiers, per exempel instruir ils passagiers, tge che sto vegnir fatg en cas d'in alarm
- tgirar e mantegnair corps da navs, indrizs e sistems da bord
- en turnus surpigliar il servetsch da guardia e controllar il local da las maschinas sco er metter las bandieras e las glischs da signal
- observar las prescripziuns legalas ed ir enturn en moda professiunala cun la rauba privlusa e cun ils ruments
Ulteriuras activitads
- manar il persunal
- procurar per la protecziun e per la segirezza da las collavuraturas e dals collavuraturs
- surpigliar la responsabladad per la planisaziun dal viadi, per che la rauba e las persunas vegnian transportadas en moda segira ed a temp
- realisar activitads administrativas, per exempel far plans da mantunar u plans d'acziun
Scolaziun
Durada
3.5 onns
Furmaziun en la pratica
Sin ina nav ch'è en gir sin las vias navigablas europeicas, p.ex. sin ina nav dal Rain. Il post spezialisà Surveglianza da la furmaziun professiunala Basilea-Citad infurmescha davart las instituziuns che porschan la scolaziun.
Furmaziun en scola
Instrucziun en bloc a la scola professiunala spezialisada Schiffer-Berufskolleg Rhein, Duisburg (D)
Roms professiunals
1. e 2. onn d'emprendissadi (ensemen cun persunas spezialisadas da la navigaziun interna AFQ):
- gidar a spustar las navs da navigaziun interna
- gidar a navigar
- transportar rauba u persunas
- tgirar e mantegnair las navs ed ils indrizs
- observar las prescripziuns
3. e 4. onn d'emprendissadi:
- manar il persunal
- mesiras en cas da donns e da disturbis
- protecziun e segirezza da las persunas
- planisaziun da viadi
Maturitad professiunala
Maturitad professiunala a la scola professiunala spezialisada Schiffer-Berufskolleg Rhein, Duisburg
Diplom
Chapitani / Chapitania da la navigaziun interna AFQ
Funcziun sco conductura u conductur da navs
Remartga: suenter il 2. onn d'emprendissadi vegn absolvì l'examen sco mariner / marinera.
Premissas
Furmaziun preliminara
- temp da scola obligatoric terminà
Pretensiuns
- gronda abilitad da lavurar en in team
- abilitad da communitgar
- dun organisatoric
- chapientscha tecnica
- sanadad robusta
- chapientscha pratica
- grond senn da responsabladad
- prontezza da lavurar durant uras irregularas
Furmaziun supplementara
Spezialisaziun
Certificat ADN per transports da rauba privlusa, certificat da func da Rain UUC, chapitani / chapitania (conductur / conductura da navs) e suenter examen da patenta da radar
Examen professiunal (EP)
Cun certificat professiunal federal: spezialist / spezialista da la duana e da la segirezza dals cunfins u polizist / polizista
Navigaziun d'auta mar
La scolaziun sin ina nav da navigaziun interna porscha la pussaivladad da fitgar pe en la navigaziun d'auta mar. In studi nautic sco uffizier / uffiziera è pussaivel.
Midada en auters secturs da la navigaziun interna
P.ex. conductura u conductur da navs sin bartgas dals pumpiers, da la protecziun da las auas, en la correcziun dals curs d'aua, survegliadra u survegliader da sclusas, guida u guid, possessura u possessur sco er chapitania u chapitani d'ina atgna nav a motor da rauba, ina nav-cisterna u ina nav da passagiers, navigatura u navigatur sin lais interns svizzers, activitad administrativa en ina cumpagnia da possessurs da navs u en in'agentura da port
Cundiziuns da lavur
Chapitanias e chapitanis da la navigaziun interna lavuran per in med da traffic cun orientaziun internaziunala, quai vul dir per ina cumpagnia da possessurs da navs u per in possessur da navs independent. Las persunas directivas èn il post da contact tranter il manaschi da navs e la cumpagnia da possessurs da navs sin terra. Lur lavur sin l'aua è pretensiusa. Ellas vivan e lavuran a bord ed èn savens pliras emnas en gir ordaifer il cunfin naziunal. Per regla lavuran ellas en il team. Ellas lavuran da tutt'aura, er la notg e la fin d'emna, perquai ch'en gronds ports da mar vegn lavurà da tuttas uras. Segirezza e cumpetenza sociala giogan ina gronda rolla a bord. Igl è obligatoric da purtar in equipament da protecziun. A bord regia in scumond d'alcohol e da drogas.
L'emprendissadi po vegnir fatg a Basilea sin ina nav dal Rain. Persunas interessadas n'han per regla nagina difficultad da chattar ina plazza d'emprendissadi. Chapitanias e chapitanis da la navigaziun interna èn persunas spezialisadas fitg dumandadas. Tut tenor la cumpagnia da possessurs da navs e tut tenor las qualificaziuns persunalas pon els navigar independentamain cun ina nav da navigaziun interna suenter ch'els han ademplì durant 7 fin 10 onns lur professiun.
Ulteriuras infurmaziuns
Associaziun svizra per la navigaziun e l'economia da port
4019 Basilea
URL: www.svs-ch.ch
Ports dal Rain svizzers
4019 Basilea
URL: www.port-of-switzerland.ch