Lavurs
Lur lavurs èn las suandantas:
Gidar persunas en il mintgadi
- gidar persunas a sa trair en ed a sa trair ora
- lavar, far la barba e tagliar ils chavels a persunas
- accumpagnar persunas a la tualetta, preparar meds auxiliars sco la sutga da notg u svidar satgs d'urin sche necessari
- unscher en cremas, bandaschar chommas e trair en chaltschiels medicinals
- mesirar il pais, la grondezza, la temperatura u il puls
- metter giu e volver persunas che ston star en letg, pia adattar lur posiziun da giaschair
- proteger l'atgna sanadad, p.ex. prender persunas en moda correcta ord il letg, senza engrevgiar memia fitg il dies
- gidar persunas a mangiar ed a baiver
Tgirar persunas
- observar midadas vi dal stadi da sanadad ed infurmar il persunal medical, sch'i dat in cas d'urgenza
- accumpagnar persunas sin spassegiadas u sin via tar la media u tar il fisioterapeut
- dar medicaments
Organisar lavurs e liquidar incumbensas administrativas
- porscher a persunas in mintgadi reglà, p.ex. organisar gieus u occurrenzas
- metter maisa e nettegiar la sala da mangiar
- nettegiar locals
- controllar apparats
- scriver glistas da cumpras ed ir a far cumpras
- zavrar laschiva, lavar, sientar, stirar e metter davent
- emplenir formulars al computer
Scolaziun
Durada
2 onns
Furmaziun pratica
En ina instituziun dals fatgs da sanadad u dals fatgs socials
Furmaziun en scola
1 di per emna en la scola professiunala
Roms professiunals
- cooperar e sustegnair tar la tgira da la sanadad e dal corp
- accumpagnar e sustegnair clientas e clients en il mintgadi
- sustegnair en il tegnairchasa
- observar e realisar l'igiena e la segirezza
- cooperar tar l'administraziun, la logistica e l'organisaziun da las incumbensas
- sviluppar e resguardar rollas professiunalas e la collavuraziun
Curs ordaifer il manaschi
Emprender, approfundar ed exercitar las basas professiunalas, 24 dis durant 2 onns
Diplom
Assistent / Assistenta per sanadad e fatgs socials AFP
Premissas
Furmaziun preliminara
- terminà la scola obligatorica
Pretensiuns
- plaschair dal contact cun persunas
- plaschair da far lavurs en il tegnairchasa e lavurs praticas
- empatia e servetschaivladad
- pazienza e respect
- abilitad da lavurar en in team e da communitgar
- senn da responsabladad
- senn per l’igiena e per l’urden
- buna sanadad corporala e mentala, abilitad da supportar squitsch
Furmaziun supplementara
Curs
Purschidas da scolas spezialisadas e da scolas professiunalas spezialisadas sco er d'associaziuns professiunalas
Emprendissadi supplementar
Assistentas ed assistents per sanadad e fatgs socials AFP pon per regla far in emprendissadi scursanì sco Spezialist / Spezialista da sanadad AFQ u sco Spezialist / Spezialista d'assistenza AFQ.
Dapli infurmaziuns dat il film davart la professiun Spezialist / Spezialista da sanadad AFQ.
Suenter pon vegnir absolvidas las medemas furmaziuns supplementaras sco per las furmaziuns da basa respectivas cun AFQ.
Cundiziuns da lavur
Assistentas ed assistents per sanadad e fatgs socials lavuran en ospitals, chasas da dimora u tar persunas a chasa. Ellas ed els fan part da teams cun spezialistas da sanadad, cun spezialists d'assistenza e cun spezialistas d'hotellaria e d'economia. Lur temps da lavur èn savens irregulars. Tut tenor il lieu da lavur lavura la glieud da professiun er durant la notg e las fins d'emna.
Assistentas ed assistents per sanadad e fatgs socials lavuran en chasas da persunas attempadas e da tgira, instituziuns per persunas cun impediments, ospitals, centers da reabilitaziun, clinicas psichiatricas u tar la Spitex. Il sectur da tgira e d'assistenza ha savens mancanza da persunas spezialisadas. En centers da persunas attempadas e da tgira è la glieud da professiun tschertgada.
Ulteriuras infurmaziuns
OdASanté
3011 Bern
URL: www.odasante.ch
SAVOIRSOCIAL
4600 Olten
URL: www.savoirsocial.ch