Lavurs
Lur lavurs èn las suandantas:
Planisar las lavurs
- planisar ils singuls pass da lavur
- controllar la rauba furnida ed annunziar a las persunas responsablas, sch'i dat problems
- preparar la maschina da cuser, la guglia ed il fil
Producir decoraziuns
- calcular la lunghezza e la ladezza da las tailas
- mesirar e tagliar ora la taila
- cuser cun la maschina u a maun cuvertas da maisa e sumbrivals cun bindels da sumbrivals ed er fixar p.ex. crutschs, rintgs ed anzas per pender si
- producir rollas per la tatona u differents geners da plimatschs
- cuser si serranetgas, bindels agraffants u nufs
Terminar las lavurs
- controllar products finids
- scriver rapports da lavur
- far glistas da material ch'è vegnì duvrà per la producziun
- metter davent material, nettegiar la plazza da lavur e dismetter rument
Cussegliar la clientella
- declerar a la clientella, tge effect che las colurs han sin in local
- enconuscher differents stils architectonics e da mobiglias
- cuser sumbrivals e plimatschs che van a prà cun il stil d'in local
Scolaziun
Durada
2 onns
Furmaziun pratica
En in manaschi da decoraziun interna u en in manaschi da producziun da la branscha da decoraziun interna
Furmaziun en scola
Per regla curs da bloc da mintgamai 5 dis en la scola professiunala spezialisada
Roms professiunals
- confecziun
- segirezza da la lavur
- protecziun da la sanadad
- protecziun da l’ambient
Curs ordaifer il manaschi
Emprender, approfundar ed exercitar las basas professiunalas, 10 dis durant 2 onns
Diplom
Cusunz / Cusunza da decoraziuns AFP
Premissas
Furmaziun preliminara
- terminà la scola obligatorica
Pretensiuns
- plaschair da textilias
- inschign manual
- moda da lavurar exacta
- senn per furmas e colurs
Furmaziun supplementara
Curs
Purschidas da scolas spezialisadas e da scolas professiunalas spezialisadas sco er d'associaziuns professiunalas
Emprendissadi supplementar
Cusunzas e cusunzs da decoraziun AFP pon per regla far in emprendissadi scursanì sco Creader u Creadra da textilias interiuras AFQ. Suenter pon vegnir absolvidas las medemas furmaziuns supplementaras sco per Creader u Creadra da textilias interiuras AFQ.
Cundiziuns da lavur
Cusunzas e cusunzs da decoraziun lavuran en ateliers da cuser. Tar pitschnas decoraziuns cusan ellas ed els plitost cun seser, en cas da grondas tailas èn ellas ed els però er savens en pe. La glieud da professiun lavura en pitschens teams cun creadras e creaders da textilias interiuras.
Cusunzas e cusunzs da decoraziuns lavuran en differents manaschis da la branscha textila. Per pudair surpigliar ulteriuras funcziuns en manaschis, ston ellas ed els dentant far ina furmaziun supplementara sco creadras u creaders da textilias interiuras.
Ulteriuras infurmaziuns
OdA Equipament da locals Svizra
2545 Selzach
URL: einrichtenschweiz.ch/de/