Lavurs
Lur lavurs èn las suandantas:
Vendita e cussegliaziun
- respunder ils telefons che arrivan
- vender products e servetschs en il rom da campagnas al telefon
- cussegliar la clientella cun l'infurmar davart ils products e las cundiziuns generalas da fatschenta, p.ex. datas tecnicas, cundiziuns da pajament, da furniziun e da garanzia
- prender encunter empustaziuns e far contracts
Assister la clientella
- evaluar las dumondas e las reclamaziuns da la clientella
- chattar soluziuns, elavurar dumondas e reclamaziuns
- trametter vinavant la clientella als posts cumpetents
- infurmar la clientella davart novaziuns
- far enquistas davart la cuntentientscha da la clientella
Recuperar la clientella
- entrar en contact cun la clientella anteriura e dumandar, pertge ch'ella ha interrut la relaziun da fatschenta
- suttametter a la clientella novas purschidas concepidas aposta ella
Lavurs administrativas
- tegnair las bancas da datas da la clientella sin il stadi il pli actual
- nizzegiar meds da lavur, sco la software da biro usitada, glistas da controlla, mussavias per discurs, fegls d'infurmaziun davart products u davart servetschs e models da contracts per obtegnair incumbensas
- nizzegiar las raits socialas per la communicaziun e per la preschientscha da l'interpresa
- observar las directivas internas e las prescripziuns da la polizia pertutgant la segirezza e la protecziun da datas
Scolaziun
Durada
3 onns
Furmaziun en la pratica
en centers da contact u en customer care centers
Furmaziun en scola
1 di per emna en la scola professiunala
Roms professiunals
- organisar la lavur e las collavuraziuns
- obtegnair clientas e clients
- sustegnair clientas e clients
- promover la loialitad da clientas e clients
- recuperar clientas e clients
- nizzegiar indrizs da communicaziun e da sustegn
- observar prescripziuns e princips
Curs ordaifer il manaschi
emprender, approfundar ed exercitar las basas professiunalas, 25 dis durant 3 onns.
Maturitad professiunala
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Spezialist / Spezialista per il dialog cun la clientella AFQ
Premissas
Furmaziun preliminara
- terminà la scola obligatorica
Pretensiuns
- plaschair d'ir enturn cun la clientella e cun linguas
- plaschair da contacts e curtaschaivladad al telefon
- fitg bunas abilitads communicativas
- bun dun receptiv
- eloquenza a bucca ed en scrit
- conscienza per la prestaziun da servetschs
- bun management da temp
- plaschair da lavurar cun computers
Furmaziun supplementara
Curs
purschidas da scolas spezialisadas e da scolas professiunalas spezialisadas, dal Schweizerisches Institut für Unternehmerschulung SIU, siu.ch, sco er da la Societad svizra d'emploiads da commerzi, kmv.ch
Examen professiunal (EP)
cun attestat professiunal federal, p.ex.:
• Spezialist / Spezialista per manar ina gruppa
• Spezialist / Spezialista da marketing
• Spezialist / Spezialista da vendita
Examen professiunal superiur (EPS)
p.ex. Expert / Experta per dumondas da manar u Directur / Directura da marketing dipl.
Scola spezialisada superiura (SSS)
studis en secturs professiunals parentads, p.ex. Econom / Economa da manaschi dipl. u Manager / Managera da marketing SSS, dipl.
Scola auta spezialisada (SAS)
studis en secturs professiunals parentads, p.ex. bachelor of science en economia da manaschi. Tut tenor la scola auta spezialisada valan differentas cundiziuns d'admissiun.
Cundiziuns da lavur
Spezialistas e spezialists per il dialog cun la clientella lavuran en biros da centers da contact u da customer care centers d'interpresas. Ellas ed els han contact cun la clientella e cun ils posts interns relevants. Tut tenor interpresa pon resultar lavurs da fin d'emna.
Spezialistas e spezialists per il dialog cun la clientella chattan plazzas en fatschentas da telecommunicaziun, tar bancas, tar assicuranzas, en interpresas publicas da transport, en interpresas da medias u tar servetschs da help desk. Ellas ed els ston adina esser al current davart las tecnologias ed ils products. Suenter l'emprendissadi pon ellas ed els lavurar sco linetrainer ed intermediar nova savida davart process e davart products a las collavuraturas ed als collavuraturs. Cun ina furmaziun supplementara correspundenta pon ellas ed els surpigliar posiziuns da direcziun.
Ulteriuras infurmaziuns
AURIS
8045 Turitg
URL: www.auris-verband.ch