Zum Titel springen

Planisader / Planisadra da tecnica d’edifizis da ventilaziun AFQ

Planisadras e planisaders da tecnica d’edifizis da ventilaziun planiseschan, calculeschan e dissegnan indrizs da ventilaziun e d’aria cundiziunada. Els surveglian la montascha e mettan en funcziun ils indrizs.

Lavurs

Els exequeschan suandantas lavurs:

Cussegliar clientella
  • cussegliar davart las differentas pussaivladads da ventilar e climatisar stanzas
  • calcular la grondezza ed ils custs e far offertas
Planisar indrizs da ventilar e climatisar
  • planisar e calcular tar renovaziuns e construcziuns novas indrizs che spargnan energia
  • sclerir cun architects, inschigners e patruns da construcziun las pretensiuns che l’indriz sto ademplir
  • resguardar ideas e pretensiuns individualas sco era cundiziuns architectonicas e prescripziuns legalas
  • erui funtaunas d’aria e d’energia adattadas e persequitar latiers  in minimum pussaivel da las emissiuns da CO2
Realisar indrizs da ventilar e climatisar
  • far la calculaziun detagliada per la fabricaziun e montascha
  • designar plans detagliads per il persunal dal magazin e da montascha ed nudar ils indris en ils plans
  • lavurar sin ils plazzals ensemen cun il persunal da montascha, ils architects u ils patruns da construcziun
  • far glistas da material, empustar il material tar ils furniturs, survegliar ils termins
  • metter en funcziun ils indrizs installads e controllar, sch’els funcziunan
  • scriver instrucziuns per l’utilisaziun e dar instrucziuns da diever
  • observar las prescripziuns per la protecziun cunter incendis sco er garantir la protecziun da l'atgna sanadad e segirezza

Scolaziun

Basa legala

Ordinaziun federala 6-10-2009 (versiun dal 1-1-2019)

Durada

4 onns

Furmaziun en la pratica

En in manaschi per indrizs da ventilaziun u en in biro d’inschigneria per tecnica da construcziun; pratica en il magasin, en il lavuratori e sin il plazzal (almain 3 mais)

Furmaziun en scola

1 di l’emna a la scola professiunala (cumplettà cun curs da bloc)

Roms professiunals

  • organisaziun dal manaschi
  • persistenza
  • segirezza da la lavur e protecziun cunter incendis
  • matematica
  • material da fabricaziun
  • basa da la chemia e da la fisica
  • terminologia e dinamica dals fluids
  • electrotecnica
  • mesirar – controllar – reglar
  • tecnica da construcziun e d’edifizis
  • process da planisaziun
  • indrizs da ventilaziun e d’aria cundiziunada

Curs ordaifer il manaschi

Emprender ed exercitar a moda pratica la basa professiunala

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "planisader / planisadra da tecnica d’edifizis da ventilaziun AFQ"

Premissas

Furmaziun preliminara
  • temp da scola obligatoric terminà
  • bunas prestaziuns en geometria, matematica, fisica
Pretensiuns
  • plaschair da dissegnar tecnicamain, a maun u al computer
  • interess per process fisicals
  • sentiment per detagls tecnics
  • enclegientscha per colliaziuns abstractas
  • moda da lavurar exacta e conscienziusa
  • talent d’organisar
  • plaschair da contact ed abilitad da communitgar, p.ex. lavur en il team e talent da contractar

Furmaziun supplementara

Curs

purschidas da centers da furmaziun da suissetec e da scolas professiunalas

Furmaziun da basa scursanida

en il champ professiunal "planisaziun da tecnica d’edifizis": planisader / planisadra da tecnica d’edifizis da stgaudament AFQ u planisader / planisadra da tecnica d’edifizis sanitars AFQ

Examen professiunal (EP)

manader / manadra da project en tecnica d’edifizis cun certificat professiunal federal, cussegliader energetic / cussegliadra energetica edifizis cun certificat professiunal federal

Scola spezialisada superiura (SSS)

tecnicist / tecnicista dipl. tecnica d’edifizis

Scola auta spezialisada (SAS)

Bachelor of Science (SAS) en tecnica d’edifizis

Cundiziuns da lavur

Planisaders e planisadras da tecnica d’edifizis da ventilaziun lavuran en manaschis per installaziuns da ventilaziun ed aria cundiziunada u en biros da tecnica da construcziun u d’inschigneria.

La purschida da plazzas d’emprendissadi è buna ed ils planisaders e las planisadras da tecnica d'edifizis da ventilaziun èn tschertgads sin il martgà da lavur. En la tecnica d’edifizis vegnan adina puspè introducids novs materials, novs sistems e novas prescripziuns, p.ex. en connex cun la minergia. Quai pretenda ina furmaziun supplementara regulara.

Ulteriuras infurmaziuns

Uniun da la tecnica d’edifizis da la Svizra e dal Principadi da Liechtenstein (suissetec)
Auf der Mauer 11
Chascha postala 1768
8021 Turitg
Tel: +41 43 244 73 00
URL: www.suissetec.ch



berufsberatung.ch